Hetimet për vrasjen e 22-vjeçares shqiptare, Ilaria Sula,
kanë zbuluar detaje tronditëse nga dëshmia e autorit të dyshuar, Mark Samson, 23 vjeç.
I riu është marrë në pyetje nga autoritetet italiane dhe ka rrëfyer dinamikën e krimit, duke dhënë detaje për mënyrën se si e kreu aktin makabër dhe përpjekjet e tij për të fshehur gjurmët.
Dëshmia e autorit
Gjatë marrjes në pyetje nga hetuesit, Samson ka pranuar krimin dhe ka zbardhur ngjarjen në detaje. Ai ka treguar se pasi e vrau të renë, e futi trupin e saj në një valixhe dhe më pas e transportoi në një zonë të pyllëzuar.
“E hodha telefonin e saj në një pusetë në Romë, trupin e ngarkova në makinën time dhe e çova në Poli”, ka rrëfyer ai.
Sipas mediave italiane, shkak i ngjarjes tragjike dyshohet të ketë qenë kërkesa e Ilaria Sulës për ndarje, të cilën Samson nuk e ka pranuar. Ai e ka ndjekur dhe ka ndërmarrë këtë akt makabër në një moment agresioni të skajshëm.
Përpjekjet për të fshehur krimin
Pasi kreu vrasjen, Samson ka bërë çmos për të humbur gjurmët. Ai ka mbajtur telefonin e viktimës dhe ka vazhduar të postojë në rrjetet sociale, duke u shtirur sikur ishte ajo. Gjithashtu, ai i ka dërguar familjarëve mesazhe nga telefoni i saj për të mos ngritur dyshime për zhdukjen.
Policia italiane arriti të zbardhë ngjarjen duke analizuar tabulatet telefonike të viktimës. Kjo çoi në identifikimin e autorit dhe më pas në arrestimin e tij.
Akuzat dhe hetimet
Aktualisht, Samson përballet me akuzat për “vrasje me dashje” dhe “fshehje të kufomës”.
Ngjarja ka tronditur jo vetëm komunitetin shqiptar në Itali, por edhe opinionin publik në Shqipëri.
Familja e viktimës kërkon drejtësi për humbjen e vajzës së tyre, ndërsa autoritetet po vijojnë hetimet për të siguruar që i akuzuari të përballet me të gjitha pasojat ligjore për këtë krim të rëndë.