Temperaturat deri në 34 gradë, IGJEO lëshon alarmin: Rr*zik zj*rresh në 10 qarqe

Sot dhe nesër, vendi ynë përballet me një kërcënim të shtuar nga zjarret në pyje, me termometrin që parashikohet të shënojë vlera deri në 34 gradë Celsius.

Sipas të dhënave të publikuara nga Instituti i Gjeoshkencave, për pasditen e së hënës, 7 shtator, dhe gjatë gjithë ditës së martë, 8 shtator, 10 qarqe janë klasifikuar në nivelin "i lartë" të rrezikut. Këto zona përfshijnë Shkodrën, Lezhën, Dibrën, Durrësin, Tiranën, Elbasanin, Fierin, Beratin, Vlorën dhe Gjirokastrën.

Ndërkaq, për qarqet Kukës dhe Korçë është parashikuar një nivel rreziku “i moderuar”, megjithatë, duhet bërë kujdes në pjesën verilindore të Kukësit dhe në jug të Korçës, ku situata paraqitet po ashtu me rrezikshmëri të lartë.

Analizat meteorologjike tregojnë se dita e sotme mbetet ajo me probabilitetin më të lartë për shfaqjen e vatrave të zjarrit.

Situata atmosferike nuk pritet të sjellë ndryshime pozitive sa i përket reshjeve, pasi ato do të mungojnë në të gjithë territorin si sot pasdite, ashtu edhe gjatë ditës së nesërme.

Sa i përket temperaturave për të martën, parashikohet që në bregdet ato të luhaten nga 22 deri në 32 gradë Celsius, në ultësira nga 18 deri në 34 gradë, ndërsa në zonat malore ato do të variojnë nga 14 deri në 32 gradë Celsius.

Lëvizja e ajrit do të jetë kryesisht me intensitet të lehtë deri mesatar, megjithatë, në hapësirat bregdetare dhe ato kodrinore-malore, erërat mund të shfaqin vrulle të forta për periudha të shkurtra.

Kombinimi i temperaturave të larta, thatësirës për shkak të mungesës së shiut dhe pranisë së erës, kërkon një mobilizim dhe vigjilencë më të madhe për të parandaluar dëmtimin e kullotave dhe sipërfaqeve pyjore nga zjarret.