Një fluturim i Ryanair nga Londra Stansted drejt Kalamata-s në Greqi u kthye në një udhëtim tronditës për pasagjerët, pasi avioni
Boeing 737 goditi një barrierë në pistën e aeroportit gjatë uljes.
Avioni përjetoi turbulenca të forta, sipas raportimeve të pasagjerëve dhe mediave britanike. Por momenti më dramatik ndodhi pasi aeroplani kishte prekur tokën në mënyrë të sigurt.
“Në një moment, teksa po lëviznim në pistë, dëgjuam një përplasje të fortë. Ishte një zhurmë tronditëse. Të gjithë u panikosëm”, tha një pasagjer për “The Sun”.
Fotot e shpërndara në rrje sociale tregojnë se njëri prej krahëve të avionit është dëmtuar rëndë, si pasojë e goditjes me barrierën mbrojtëse në fund të pistës.
Sipas linjës ajrore Ryanair, pas inspektimit nga ekipet teknike dhe kryerjes së mirëmbajtjes së nevojshme, avioni u kthye në shërbim.
Megjithatë, dëshmitë e pasagjerëve tregojnë se frika për një zjarr të mundshëm dhe ardhja e zjarrfikësve shtuan panikun.
“Në bord u tha se mund të ndodhte një ulje e vështirë, por kur na kërkuan të qëndronim në vend për të pritur zjarrfikësit, shumë prej nesh u frikësuan se mund të kishte një shpërthim apo zjarr”, rrëfeu një tjetër udhëtar.
Autoritetet greke nuk kanë komentuar ende zyrtarisht mbi incidentin, ndërsa nuk raportohet për persona të lënduar, shkruan The Mirror.