Një ngjarje e rëndë u regjistrua disa ditë më parë në Itali ku 25-vjeçari shqiptar, Rivaldo Rusi u qëllua për vdekje nga biznesmeni italian, Aurelio Valiante.
Siç dhe raportuan më herët mediat vendase ngjarja u regjistrua në Centola, mbrëmjen e së dielës, ku i riu shqiptar së bashku me një tjetër shtetas u futën në banesën e 60-vjeçarit për ta grabitur.
Por, ky i fundit sapo vuri re prezencën e dy të rinjve në banesën e tij hapi zjarr ndaj tyre. Si pasojë e plumbave, fatkeqësisht humbi jetën Rivaldo Rusi, ndërkohë që i riu tjetër ndodhet në një spital në Napoli në gjendje të rëndë për jetën.
Pas kësaj ngjarje policia shoqëroi Valienten i cili pohoi para karabinierëve se disa persona tentuan që të vjedhin vilën e tij. Në momentin që i pa ai tregoi se mori çiften dhe qëlloi në drejtim të tyre.
Një nga plumbat la vdekur në vend Rivaldo Rusin, i cili la jetim një fëmijë të mitur, ndërsa bashkëkombasi i 25-vjeçarit mbeti i plagosur.
Pas marrjes në pyetje nga autoritetet italiane, Valiante ka pranuar edhe se ka fshehur trupin e pajetë të viktimës. Ai tashmë përballet me akuza për vrasje, fshehje trupi dhe plagosje të rëndë.
Ishin karabinierët dhe kryeprokurori Francesco Rotondo, të cilët falë informacionit të dhënë, shkuan në fshatin San Severino di Centola ku në një zonë të izoluar, disa kilometra larg vilës të biznesmenit e gjetën trupin e pajetë të 25-vjeçarit të varrosur në një gropë.
Ndërkohë, në Sant’Andrea del Pizzone, një lagje e banuar e komunës së Francolise, banesa e të ndjerit është kthyer në vend pelegrinazhi nga bashkëatdhetarë të shumtë, të cilët kanë shprehur solidaritet me familjen e të riut. Rivaldo Rusi la pas një grua të re dhe një fëmijë të vogël.
Lidhur me këtë ngjarje ka folur edhe bashkëshortja e viktimës e cila mes lotëve u shpreh për mediat italiane se bashkëshorti i saj kishte bërë gabim, por që nuk e meritonte një fund të tillë.
“Ai bëri një gabim, por nuk duhej të kishte vdekur kështu. U varros si kafshë. Na la një fëmijë pa baba”, ka thënë ajo.