Këngëtari i njohur Luiz Ejlli ka ndarë pak më parë një lajm të hidhur me ndjekësit e tij në Instagram.
Ai ka njoftuar se ka ndërruar jetë miku i tij i afërt, kameramani Ervin Hoti.
“Sot u trishtova pa masë kur mora lajmin për ndarjen nga jeta të Ervin Hotit.
Ervini nuk ishte vetëm një kameraman, por një mik i rrugëtimit tim artistik. Ai ka qenë aty që në hapat e parë tek ‘Ethet e së premtes mbrëma’, në festivalet e RTSH-së, në koncerte e intervista, duke fiksuar me kamerën e tij kujtimet që mbetën të gjalla edhe sot. I qetë, i përkushtuar dhe gjithmonë me buzëqeshje,” ka shkruar Ejlli.
Mesazhi i tij ka prekur fansat dhe miqtë e artistit, duke sjellë reagime të shumta ngushëllimi për humbjen e parakohshme të Hotit.