Bilbili i Labërisë, Bujar Tabulla ka ndërruar jetë në moshën 65-vjeçare. Artisti i njohur, një nga zërat më të dashur dhe të veçantë të këngës labe, u nda nga jeta mbrëmjen e djeshme pas një sëmundjeje të rëndë që e mundoi në vitet e fundit.
I lindur dhe rritur në Delvinë, Bujar Tabulla nisi të këndonte që fëmijë, duke u bërë edhe themeluesi i grupit të qytetit “Djemtë e Delvinës” ku spikati me zërin e tij të ngrohtë, të pastër dhe plot emocion.
Breza të tërë e njohën si “bilbilin e Labërisë”, një nofkë që nuk iu dha kot, por e fitoi me shpirt e talent, me pasionin dhe përkushtimin që i dha këngës polifonike shqiptare.
Tabulla gjithashtu shërbeu për vite me radhë në ndërmarrjen e pyjeve, duke i qëndruar afër natyrës, me të njëjtën dashuri me të cilën i këndonte asaj.
Zëri i Bujar Tabullës do të jetojë në çdo këngë që ai këndoi, në çdo zemër që ai preku me artin dhe fisnikërinë e tij.