Ndeshja mes Shqipërisë dhe Serbisë, e zhvilluar mbrëmjen e djeshme në stadiumin “Air Albania”, u mbyll me rezultatin 0-0.
Një përballje e mbushur me tension, emocione dhe raste të shumta për kuqezinjtë, të cilat nuk u konkretizuan siç duhet – përfshirë edhe një moment vendimtar: penalltia e humbur nga Rei Manaj në fundin e pjesës së parë.
Ky episod duket se ka ndezur zemërimin e tifozëve shqiptarë, të cilët pas ndeshjes kanë shpërthyer në rrjete sociale.
Komentet kritikuese dhe ofendimet në adresë të sulmuesit kuqezi janë shtuar me shpejtësi, duke reflektuar një zhgënjim të thellë për mundësinë e humbur të fitores.
Përveç reagimeve në komente, Manaj ka pësuar edhe një “goditje virtuale”: vetëm në pak orë ka humbur mbi 2 mijë ndjekës në Instagram, një tregues i qartë i pakënaqësisë së tifozëve ndaj tij.
Pavarësisht kritikave, Rei Manaj mbetet një nga emrat me përvojë në sulmin e kombëtares, dhe trajneri Sylvinho pritet të japë mbështetjen e tij për lojtarin në ditët në vijim.