Françeska Murati rrëfen ndarjen nga babai i djalit: E vërteta për foton që ndezi thashethemet

Ish-banorja e reality show-t Big Brother VIP 3, Françeska Murati, ka thyer heshtjen duke ndarë me publikun detaje mbi fundin e lidhjes me babain e fëmijës së saj.

Në një bisedë të hapur për ndjekësit, ajo ka sqaruar pozicionin e saj aktual pas periudhës së ekspozimit publik. Gjatë një interviste ekskluzive në emisionin “Ftesë në 5”, të moderuar nga Bieta Sulo, ajo sqaroi se lidhja me ish-partnerin ka marrë fund prej kohësh, ndonëse mes tyre ruhet një kulturë komunikimi dhe respekti reciprok.

Për ish-konkurrenten, pavarësisht ndryshimit të statusit, ruajtja e një raporti të shëndetshëm njerëzor mbetet prioritare. Duke reflektuar mbi lidhjen e tyre afatgjatë, ajo theksoi se dashuria mes tyre ka evoluar në një miqësi të thellë.

Duke pasur parasysh se ata janë njohur qysh në moshën 15-vjeçare, ish-partneri mbetet një pikë mbështetjeje kyçe në jetën e saj. “Kam dashur të flas më herët, por gjithmonë jam gjendur mes dëshirës për të ruajtur jetën private dhe faktit që tashmë jam personazh publik. Njerëzit që më duan duan të dinë më shumë për mua, sidomos pasi jeta ime u bë shumë e ekspozuar gjatë Big Brother. Por, kur bëhet fjalë për persona që nuk janë pjesë e botës publike, nuk dua t’i përfshij në një realitet që nuk u përket. Ne na bashkon një dashuri e madhe për fëmijën tonë dhe e duam jashtëzakonisht shumë djalin”, u shpreh Françeska.

Për më tepër, ajo përgënjeshtroi kategorikisht versionet se fama apo hyrja e saj në formatin televiziv të njohur ishin faktorët vendimtarë për ndarjen, duke e cilësuar këtë narrativë si të pavërtetë.

“Për ta thënë qartë, ne jemi ndarë dhe kjo ka ndodhur prej kohësh. E duam njëri-tjetrin si njerëz dhe si miq, sepse jemi njohur që kur ishim 15 vjeç. Ka ardhur një moment kur marrëdhënia jonë është kthyer në një lidhje miqësore, por me shumë dashuri dhe respekt. Nuk është e vërtetë që hyra në BB, m’u rrit mendja dhe shkatërrova familjen. Këto janë thjesht trillime. Ne takohemi çdo ditë dhe kemi marrëdhënie të mira edhe me familjet e njëri-tjetrit. Ata e dinë shumë mirë se mes nesh ka respekt. Kemi diskutuar bashkë edhe për shumë çështje. Ai është një njeri fantastik dhe ne jemi ‘best friends’, sepse jemi rritur së bashku”, tha ajo.

Në përfundim, Françeska adresoi edhe thashethemet rreth jetës së saj sentimentale, duke u ndalur specifikisht te fotografia e diskutuar në plazh ku dukej një siluetë në syzet e saj.

Sipas saj, imazhi në fjalë ka qenë subjekt i ndërhyrjeve digjitale për të krijuar aludime të rreme, ndërsa në të vërtetë ajo ka qenë në pushime me një shoqe të sajën.

“Le të flasim për atë që ka ndodhur realisht: ajo video është përpunuar me Photoshop. Më duket shumë për të qeshur, sepse fotografitë e mia janë manipuluar disa herë edhe me AI dhe në to janë shtuar elemente që nuk kanë qenë aty. Atëherë isha me një shoqe. Tani nuk mund t’u jap shpjegim çdo manipulimi që publikohet, sepse do të lodhesha pa fund. Për më tepër, çdo ditë shfaqen lajme të reja dhe shpesh pyes veten se nga dalin këto trillime. Nuk dua as t’i përmend, sepse vetëm mendimi për to të lodh. Nuk mund ta shpenzosh jetën duke u përballur me mashtrime. Unë jam një person privat, jo një sekret”, deklaroi Françeska.