Fansat e reality show-t më të ndjekur në Kosovë, Big Brother VIP Kosova, mund të fillojnë të bëhen gati për emocione të reja.
Pas tre edicionesh të suksesshme që kanë mbërthyer vëmendjen e publikut, tashmë përgatitjet për sezonin e katërt janë në kulmin e tyre.
Moderatori Alaudin Hamiti, ka ndarë së fundmi një lajm të rëndësishëm në rrjete sociale, duke zbuluar se shtëpia e këtij sezoni do të jetë krejtësisht e re.
E rimodeluar dhe e përshtatur deri në detaj, ajo do të sjellë surpriza të mëdha jo vetëm për banorët, por edhe për shikuesit që e ndjekin çdo moment.
Ndërkohë, thelbi i lojës mbetet i pandryshuar: izolim i plotë nga bota e jashtme, një garë e fortë mes konkurrentëve dhe një rrugëtim i mbushur me strategji, emocione dhe situata të paparashikuara.
Për çdo banor, qëndrimi brenda shtëpisë do të jetë një test i vërtetë i durimit, i karakterit dhe i aftësisë për të fituar mbështetjen e publikut.
Në vetëm pak vite, BBVK është shndërruar në një nga programet më të ndjekura në Kosovë dhe rajon.
Ai ka prodhuar debate të zjarrta, miqësi të forta, histori dashurie, por edhe ndarje që kanë bërë bujë në media dhe rrjete sociale.
Çdo edicion ka sjellë momente që publiku i ka përjetuar sikur të ishte pjesë e shtëpisë.