Kreu i Bashkisë Dropull, Dhimitër Toli, ka reaguar në lidhje me situatën e zjarrit në Kakavijë. Toli ka bërë me dije se janë djegur katër shtëpi si dhe janë shpëtuar katër banorë nga zjarri. Sakaq, për shuarjen e flakëve ka ndërhyrë nga ajri edhe pala greke.
“Është situatë emergjente në Kakavijë. Janë djegur 3-4 shtëpi të fshatit. Ende nuk dihen motivet për zjarrin, policia po heton. Zjarri është në shumë zona të banuara të fshatit. Situata në këto momente është nën kontroll.
Kanë ardhur zjarrfikëse nga Gjirokastra dhe nga ajri ka ardhur ndihmë nga Greqia, pasi zjarri ka kaluar edhe në anën greke.
Shtëpitë kanë qenë të banuara, nxorëm 4 persona nga shtëpitë. Zjarri ka ardhur poshtë Kishës së fshatit, ende nuk dihen shkaqet.
Situata në këto momente duhet të kemi kujdes, sepse zona është plot me pisha. Koha është shumë e papërshtatshme për këto situata.”-tha Toli.
Zjarri në doganën e Kakavijës ka bërë që pala greke të pezullojë punën pasi tymi ka nxitur policët që të largohen. Procesi i kalim-përpunimit të pasaportave është ndërprerë duke shkaktuar kështu radhë kilometrike të automjeteve si në hyrje dhe në dalje të territorit grek.
Forcat zjarrfikëse greke janë angazhuar për të bërë të mundur neutralizimin e flakëve. Raportohet se do të ndërhyjë edhe një helikopter për të shuar zjarrin.
Gjithashtu sot një zjarr ka rënë në ambientet rrethuese të një kishe në Kakavijë. Flakët janë përhapur me shpejtësi nga era e fortë.