Një person i tretë ka rënë në pranga të policisë i dyshuar si bashkëpunëtor i 26-vjeçares Ermalinda Rama, e cila mbyti me tel babain e saj, Anesti Rama, në bashkëpunim me të ëmën, Valbona Rama, e më pas e kanë masakruar në pjesët intime.
Personi i arrestuar është identifikuar si Çlirim Dogani, banues në fshatin Arapaj të Roskovecit. Referuar njoftimit të Policisë së Shtetit, Çlirim Dogani ka ndihmuar Ermalinda Ramës në mbytjen e babait të kësaj të fundit, ku dhe janë përdorur sende të forta e mjete prerëse.
“Punë e pandërprerë hetimore për zbardhjen e plotë të rrethanave të ngjarjes së ndodhur në fshatin Frashër, ku shtetasja E. R. vrau për motive të dobëta, babanë e saj.
Vihet në pranga bashkëpuntori i 26-vjeçares.
Në vijim të hetimeve të kryera me qëllim dokumentimin e plotë të rrethanave të ngjarjes, specialistët e Seksionit për Hetimin e Krimeve Kundër Personit të Drejtorisë Vendore të Policisë Fier bënë ndalimin e shtetasit Ç. D., 55 vjeç, banues në fshatin Arapaj, Roskovec.
Nga kryerja e hetimeve dyshohet se ky shtetas ka bashkëpunuar me shtetasen E. R., në vrasjen e babait të saj nëpërmjet strangulimit (mbytje me tel), si edhe duke përdorur sende të forta dhe mjete prerëse.
Materialet procedurale iu referuan Prokurorisë së Fierit, për veprime të mëtejshme”, njofton policia.
Ermalinda Rama dhe e ëma, Valbona Rama, tashmë të arrestuara, fillimisht kanë tentuar që ngjarjen ta trajtojnë aksidentale duke thënë se 56-vjeçari u rrëzua në tualet, por më vonë kanë pranuar krimin.
Shkak për vrasjen e të atit, Ermalinda dëshmon se babai nuk e lejonte që të jetonte e lirë, të vishej, të dilte me shoqet e madje as nuk i jepte para, deklarata këto të mbetura ende në kuadrin e pretendimeve.
Referuar dëshmive të familjarëve, në këtë rast të kunatës së viktimës, dhe fqinjëve, ata janë shprehur se Anesti Rama nuk merrte asnjëherë para në dorë, pasi nuk dinte shkrim e këndim dhe se rrogën që merrte nga puna që bënte në një serë bujqësore, i tërhiqte bashkëshortja me të bijën në bankë me anë të një prokurore të posaçme.