Si çdo fillimi muaji astrologia Meri Shehu në studion e “Rudina” në Tv Klan bëri parashikimin për 12-të shenjat e horoskopit, për muajin Shkurt.
Edhe pse është muaji më i shkurtër i vitit sipas Meri Shehut do të jetë i mbushur plot me dinamika.
Afërdita në shenjën e Dashit, Hëna e plotë në shenjën e Luanit dhe Hëna e re në shenjën e Peshqve
nuk do të lënë të qeta shenjat këtë muaj.
Shkurti është muaji i dashurisë dhe jo më kot nuk do të mungojnë flirtet, takimet romantike, madje sipas Meri Shehut, një pjesë e shenjave dashurinë e tyre do e kurorëzojnë me një fejesë ose një martesë.
“Mesa duket pranvera këtë muaj vjen një muaj më shpejt, sepse Afërdita do të futet në shenjën e Dashit. Duke u futur Afërdita në shenjën e Dashit është njësoj sikur të vijë një pranverë shumë e papritur për ne dhe të na japë shumë kënaqësi dhe dashuria do të jetë ajo që do të ulet këmbëkryq më shpejt se sa vitet e tjera.
Këtë Shkurt do të “gënjehemi” nga dashuria pak më shpejt. Është vërtet muaji më i shkurtër i vitit, por do të jetë me dinamika shumë të mëdha sepse siç e thashë në datën 4 futet Afërdita në shenjën e Dashit, në shenjën e fillimit të gjërave të reja dhe është shenja e flirtit.
Kështu që në datën 4 ne do të fillojmë të flirtojmë pambarimisht dhe do të vazhdojmë të ndjejmë nevojën e një dashurie të madhe, spontane, të zgjasë sa të zgjasë. Si shenjë e zjarrit Dashi na jep vrull”.
“Po ashtu në datën 4, Jupiterin kemi shumë muaj që e kemi parë në Binjak, por është i kundërt kështu që do të kthehet në rrugën e tij të drejtë. Kjo do të ndikojë tek të gjithë ne, të gjitha gjërat që ne na janë pezulluar, që na janë vonuar dhe çdo gjë që është bllokuar tashmë fillojnë dhe të çlirohen. “Formacioni” do të jetë i shpejtë, i hapur, nuk do të ketë më mbyllje ose fshehje, çdo gjë do të dalë në ditë.
Kemi dhe Hënën e plotë në datën 12 në shenjën e Luanit që është një Hënë e plotë shumë e shndritshme në një shenjë dashurie, erotike dhe kjo, që do të kombinojë bukur me Afërditën në Dash dhe do u japë Luanëve, Ujorëve, Akrepëve dhe Demave guximin për të thënë ato gjëra që nuk kanë mundur të thonë deri tani. Deri tani nuk kanë dashur që të thonë fjalën e fundit, por tashmë pas datës 12 mund ta bëjnë pa frikë”.
Në datën 14, Mërkuri futet në shenjën e Peshqve. Kjo do të thotë se do të fillojë arti, apo komunikimi elitar që ka të bëjë me të bukurën, artin dhe poezinë.
Të gjitha këto do të fillojnë që të marrin një drejtim shumë pozitiv dhe meqë është muaj i shkurtër Shkurti e mbyllim në datën 28 me Hënën e re në shenjën
e Peshqve që do të na lërë një shenjë të mirë, të këndshme sa i përket Peshqve, Shigjetarëve, Binjakëve dhe Virgjëreshave që do të fillojnë të ndjejnë vërtet një hapje të re në fund të muajit Shkurt”, tha astrologia./tvklan.al