Një vrasje tronditëse ka ndodhur në fshatin Pirg të Maliqit, ku një 14-vjeçar humbi jetën pas një përplasjeje me një bashkëmoshatar të tij.
Sipas hetimeve të deritanishme, disa ditë para ngjarjes autori i dyshuar kishte shkuar në fshatin Zvirinë dhe para lokalit të xhaxhait të viktimës kishte xhiruar gomat e makinës së tij dhe më pas ishte larguar.
Mëngjesin e ditës së ngjarjes, viktima së bashku me një shok kanë shkuar në fshatin Pirg për t’u qethur në një berberanë pranë lokalit ku ndodhi vrasja. Ata kanë vënë re autorin duke kaluar me makinë dhe i kanë fishkëllyer, me qëllim për t’u sqaruar për mosmarrëveshjet e mëparshme.
Autori ndaloi makinën, doli jashtë dhe nisën të debatonin. Sipas hetimeve, ai ka nxjerrë thikën, ndërkohë që viktima tentoi të mbrohej duke marrë një karrige nga oborri i lokalit dhe duke e vendosur përpara trupit. Gjatë hapave mbrapa, viktima është penguar dhe autori e ka goditur me thikë, duke shkaktuar plagë fatale.
Ngjarja e plotë është kapur nga kamerat e sigurisë së lokalit, të cilat tregojnë çdo moment të konfliktit.
Policia dhe autoritetet po vijojnë hetimet për të siguruar se drejtësia të zbatohet për këtë ngjarje tragjike.