Një skandal i pazakontë ka tronditur komunitetin shqiptar në Diasporë, pas një akt bamirësie që përfundoi në zhgënjim të thellë.
Katër të rinj shqiptarë nga Shipëria, Kosova dhe Maqedonia e Veriut, të cilët jetojnë në shtete të ndryshme të Europës, vendosën të mbështesin banorin e tyre të preferuar të Big Brother VIP Albania, Gjestin, duke organizuar një aksion simbolik.
Ideja ishte mbledhja e një shumë prej mbi 5,000 euro për të realizuar një surprizë spektakolare përmes fluturimit të parashutave dhe dronëve mbi shtëpinë e BBVA – një gjest dashurie dhe përkrahjeje për Gjestin. Por, surpriza nuk ndodhi kurrë.
Sipas hetimeve të emisionit investigativ “Piranjat”, organizimin dhe administrimin e fondeve e kishte marrë përsipër Diamant Aliu, 32 vjeç, nga Ferizaj. Pasi paratë u transferuan tek ai, Diamanti u zhduk pa lënë gjurmë dhe pa dhënë asnjë informacion mbi realizimin e projektit.
Gazetarët e “Piranjat” udhëtuan drejt Ferizajt për të gjetur Aliun dhe për ta përballur me pyetje. Pas disa përpjekjesh, ata e gjetën pranë shtëpisë së tij, por ai refuzoi të japë ndonjë deklaratë dhe mbylli derën, duke shmangur çdo përgjegjësi.
Ndërkohë, bashkëshortja e tij deklaroi se ishte ndarë prej kohësh nga ai dhe nuk kishte asnjë lidhje me ngjarjen. As familjarët e Diamantit, të cilët ndodheshin në një fshat pranë Ferizajt, nuk ishin të disponueshëm për të dhënë një koment.
Ngjarja ka shkaktuar zemërim të madh në rrjetet sociale. Mbështetësit e Gjestit dhe ndjekësit e reality-show-t kërkojnë drejtësi dhe transparencë për rastin, ndërsa shumë prej tyre ndihen të mashtruar nga një akt që duhej të ishte simbolik dhe pozitiv.