Simptomat e artritit reumatoid mund të përfshijnë ënjtje, inflamacion dhe ngurtësi në gishta, krahë, këmbë dhe kyçet e dorës,
që ndodhin në të njëjtat nyje në të dyja anët e trupit, të cilat bëhen më prezente veçanërisht pas zgjimit. Por, fillimi dhe paraqitja e sëmundjes varet shumë edhe nga mosha e pacientit.
Në moshat më të reja artriti reumatoid fillon me temperaturë të lartë, me dhimbje të kyçeve apo me prekje të kyçeve të kolonës vertebrale, ndërsa në moshat më të mëdha fillon me temperaturë të lartë dhe prekje të organeve pa evidencë të mirëfilltë të prekjes së kyçeve.
Mendohet që personat që kanë një predispozitë familjare, pra, që kanë një familjar të rrethit të parë dhe të dytë me artrit, janë më të predispozuar për të bërë artrit. Por vetëm gjenetika nuk mjafton pasi ndikojnë edhe faktorë të tjerë të ambientit, siç mund të jenë viruset, bakteret, myket, përdorimi i duhanit etj.
Më poshtë janë simptoma të artritit që nuk duhet t’i injoroni, pasi ato mund të jenë simptoma të komplikimeve ose efekteve anësore nga mjekimi që merrni.
ETHET
“Ethet mund të sinjalizojnë diçka serioze ose sëmundje shumë aktive ose infeksion”, thonë mjekët reumatologë. Infeksionet mund të përkeqësohen shpejt nëse jeni duke marrë ilaçe që e rrisin sistemin imunitar, prandaj është e rëndësishme që të merrni trajtim sa më shpejt.
PROBLEMET E FRYMËMARRJES
Nëse vuani nga artriti reumatoid, ju jeni në një rrezik më të lartë për të pasur probleme me mushkërinë. Ndaj edhe kontaktoni menjëherë mjekun tuaj nëse keni kollë që nuk do të largohet ose keni vështirësi në frymë- marrje edhe gjatë aktiviteteve normale.
DHIMBJE STOMAKU OSE PROBLEME DIGJESTIVE
Sëmundja e artritit në vetvete rrit shanset për ulcera, gjakderdhjen e stomakut dhe komplikacione të tjera si koliti apo diarreja, të cilat mund të jenë shenjë paralajmëruese se prezenca e shumë baktereve në zorrët tuaja është jashtë bilancit.
SHPIME NË PJESË TË NDRYSHME TË TRUPIT
Nyjet tuaja të fryra mund të shtyjnë kundër nervave, gjë që mund t’ju bëjë të keni ndjesinë e shpimeve në pjesë të ndryshme të trupit tuaj. Vende të zakonshme për të ndodhur këto janë bërrylat, këmbët dhe kyçet e dorës. Inflamacioni i enëve të gjakut, i quajtur vaskuliti, mund, gjithashtu, të shkaktojë mpirje.
PROBLEMET E SYVE
Inflamacioni, i cili vjen me sëmundjen tuaj, mund të dëmtojë sytë. “Dhimbja e syve ose skuqja që shkon duke u përkeqësuar duhet të vlerësohen menjëherë”, apelojnë mjekët.
KOCKAT E THYERA
Disa medikamente që përdoren për trajtimin e artritit reumatoid mund të shkaktojnë humbjen e kockave, gjë që shton apo rrit rrezikun e thyerjeve. Edhe kockat tuaja mund të dobësohen nëse shmangni stërvitjen dhe aktivitetin fizik. Një kockë e thyer mund të jetë një shenjë që ju po zhvilloni osteoporozën.
NDRYSHIMET E HUMORIT
Depresioni ose ankthi ndonjëherë shkojnë së bashku me këtë sëmundje. Kjo ndodh me rreth një të tretën e njerëzve me artrit. Bisedoni me mjekun nëse vëreni ndonjë ndryshim apo luhatje të humorit. Ai mund të sugjerojë terapi ose ilaçe për të ndihmuar në trajtimin e tij.
HUMBJA E DËGJIMIT
Disa kërkime sugjerojnë që RA ose ilaçet që përdoren për ta trajtuar atë mund të shkaktojnë probleme dëgjimi. Nëse ju ose familja juaj vëreni një ndryshim në aftësinë tuaj për të dëgjuar, mjeku juaj mund të jetë në gjendje të rregullojë medikamentet tuaja ose të rekomandojë një aparat dëgjimi.