Është ndarë nga jeta pronari i Televizionit ACTV, Albert Spahi (Beni) në moshën 62 vjeçare, një televizion që ishte themeluar për diasporën shqiptare në SHBA.
“Pas një sëmundjeje të rëndë, Beni u largua sot drejt parajsës së përjetshme i rrethuar me dashuri nga familjarët e tij, nga miq dhe të afërm, të cilët të pikëlluar humbën sot në mënyrë të parakohshme njeriun e pazëvendësueshëm”, shkruan stafi i televizionit ACTV.
“Ai ishte simbol i humanistit të thjeshtë dhe punëtor. Albert Spahi këtu në Amerikë ishte një biznesmen i suksesshëm, por edhe një intelektual i formuar”.
Ishte një artist i vërtetë, instrumentist, interpretues, humorist i këndshëm që mbushte çdo hapësirë shoqërore me optimizëm dhe pozitivitet”.
“Ai vraponte çdo ditë, punonte shumë sikur të ishte në garë me kohën”.
“Ai la pas një boshllëk të madh. Do t’i mungojë shumë familjes dhe të afërmve, shokëve dhe miqve”, ishte njoftimi i stafit të Televizionit ACTV.